جان عدنه بالوحده ضابط  كلش لوكَي .. يعني مسويه بليه ملح ... واذا تسولف وياه  بسهوله وهو واكَف ممكن ايسوي عندك ضغط واحتمال يجلطك اذا بقيت وياه  ساعه زمان ... المهم ماينبلع لا ابسفن آب حجم عائلي و لا بنص كيلو  فوار ..
 هذا من جان يكًعد الصبح ويطلع من غرفته ويشوف جدارية صدام يستدير بطريقه عسكريه وياخذ تحيه للصوره... ابن الطراكَـ ...
 اكو ضباط تبتسم من اتشوفه واكو تنخلس !!! شتكوول العالم ,واحد ساقط وممكن ايوديك وره الشمس اذا تحجي ...
 المصيبه الاكبر جلمه والثانيه قال السيد الرئيس وقال السيد الجباح... ولو ما الرتبه العسكريه على اجتافه ... جان كل شويه ردح للريس بساحة العرضات
 بالعفو مال وزير الدفاع عدنان خير الله الي زعّل صدام  منه ولان زعل صدام  والكَبر... انسلكَـ  خال الويلاد على يد  العميل الخائن " خلل فني " بالطياره من رجع  البغداد  وبتآمر سافر ومبيت من العواصف الصهيونيه  الايرانيه ,بنفس الطياره الي اخذت صدام وعايلته وعشيقته اليونانيه الشكَره للشمال يم كاكه مسعود يتونسون , ومن قدرة الله جان  يتصلون من بغداد ايريدون عدنان  .. ايبااااااااه على كَولت عبعوب
..منو اتصل وليش ؟؟ محد عرف ...على ساس كان اكو واحد غير صدام ينطي اوامر  ....
النتيجه علسه وانتهه.. نرجع السالفتنه..
التحق للوحده جم مكَرود هارب بذاك العفو بس حظهم الكَامز اتلكَاهم الوكَــ من انجبت الارض في تاريخ  البشريه
 اوكَفهم بالشمس خمس ساعات  بالحر مال البصره ... وظل يثرد براسهم وطنيات وشعارات  منكَعه باللواكَه وطيحان حظ زلم كَبل السقوط ....
وبين جلمه وجلمه , انتو خونه , متآمرين , خمينيين , دعوجيه , لو بيدي اعدمكم ياخونه  لو بيدي  ,نفط واحركَم ... انتو جريمه اتشربون من دجله والفرات   ...بس شنسوي لابو كَلب الطيب ويأشرعلى صورة صدام .. لا ياابن اللوكَي .. اصلا العفو جان مو من صدام !!
 ذاك اليوم من طكَت بالانبار  وراحت قوه  تسحل العلواني ابو ضروس غاليه... وصاحب  فكرة احتلال ايران خلال اسبوع
كَمز زعيم الخريط الاصفر .. وصاح انبارنا الصامده ... واربع مليارات لاعمارهه ... هسه هاي شنو علاقته بهاي  ....  مندري
ورد عليه واحد ثاني نص اخمص , هم من خردة الشيعه  المطشره... وكَال صوت السنه سيرتفع .. اكثر من اصوات المفخخات .... وين يرتفع بعد.... لله
صاحبنه ابو الانطعاجات اللولبيه في مسار الديمقراطية المنبعثة من تلافيف مجاري القمقم العراقي المصخم... اتلكَه النجيفي  وحظنه ايبوس بيه اتكَول ليلى علوي .. وهو جان شارهم عالحبل قبل يوم ويلعلع صوته بالاعلام  ولا دايحات الكسره والميدان  , ذني المكافحات بشرفهم الاطهر من النجيفي ومن ربعه ...
انوب ختمهه الاسمر الطويل وزير الشباب التازه بزيارته  لكوردستان...وبدل مايوصيهم ايديرون بالهم على النوادي الرياضيه الي يوميه معتدين عليه  ومفشخينهم في ملاعب كردستان وسب وشتم بالعربجه.. ايطالب هذا السليت المجلسي " دام طوله الراهي "  ببناء مدينه رياضيه في اربيل,على حساب الخلفونهه ..  لاسباب  لوكَيه  اتصيح لامه وابوههه
اولا  ,لقلة  صادرات النفط المهرب  للخارج لان السوكَـ خرط  بعد ضربت داعش , ومن صوب ثاني الجنوب والوسط انترس ملاعب ومدن رياضيه اتخبل الواحد وينطر ايشكَـ اهدومه ويطلع عريان ويذب روحه بالمسابح المنتشره في كل  مدن المعدان الهنود على كولة طه الدليمي و طه اللهيبي ابن السطعش الف لهيبي  ....
والناس بدت تضايق من كثرة المهرجانات الرياضيه والجماهير الي تشوه منظر المدن الجميل بالنفايات  التي ترميها في الشارع.
ايكَولون الخنزير حتى لو تسبحه بشامبو هيد شولدرز ومي ورد ... هم  ايرد اينام بالخيسه... ومايستقر ضميره الا وهو ينكَط طهاره ..  فقصة اللواكَه عبر التاريخ ,
  تخلينه.. نفهم شنو الي كَاعد ايصير وليش جم واحد امتهنو اللواكَه  والتبويس  خلفاً للمرحوم عرفات
ولوهذه مجرد راس الزباله الظاهر فوق السطح!!! 

فرحان العراقي
امير الفقراء