عمي صگبان تخربط عدّنه ذاك اليوم وره العشه ,چان ايسولف ويضحك مابيه شي الله وكيلكم , بس بساع بساع ..ظل يشكي من راسه ويلوب مثل السمچه المزوهره,ناس گالت يمكن صعد عده الضغط وناس گالت خاف ضربة شمس وخبراء العلاج بالعطابه, نصحوه ايروح يم ام ساچت بلكي اچويه بعرچ اذنه ويطيب ...
الرجال مشتعل جد جده وحاير برويحته!!! واحنه گاضينهه كل واحد براي, مدري نوديه للمضمد مدري نوديه لام ساچت.

ابن عمي كاظم عود مثغف وسدري للنخاع ومومن لايُرد له دعاء...گال ماكو غير انشّد راسه بعلگ من خيمه الغايد الي حصلته گبل چم يوم من الاعتصام...
ابو هاشم كله بركه ومسدد من السماء ومشاريعه الهيه بحته.

ـ  گتله كفنه بلّه من اعلوگتكم وسوالفكم التعبانه...وخلينهه على ابو خيمة الزرگه هواي ابرك وارحم من ابو خيمة الخضره, چيفن يوميه براي..وخافن يسحب روح ابوك اذا اختلفت عده النيه مثل مااختلفت ذاك اليوم وسحب نوابه من الاعتصام...

وصار رايي انا المتحچي انه اخذه للمستشفى... لكن عقيلته ام كاظم شرعت تلطم على رفيق النضال الطويل وهيه تراه يتهاوى كالبعيرالمنعقر وتصيح بصوت شجي ولا ام كلثوم في" انت عمري " ولكم الحگولي زلمتي راح ايروح مني وانتم تتناگرون بيناتكم چنكم شرايچ...خلونه انوديه للمضمد براس القطاع وهو يصير مثل الحصان...
امرأة تعشش برأسها زريبه للحيوانات الداجنه وتصف حبيبها بالحصان لايمكنها الانصياع لنا.
 
جيب الليف اودّي الليف.. تالي متالي ونزولا لراي الاغلبيه العائليه ومبدأ ديمغراطيه التسديد الالهي..صار الراي انه ناخذه للمضمد لانه تكنقراط زرق ابر وطهور ,وهناك هم اشتغلت الخيارات والتخت رمل من جديد , وصفه راي ابو عادل المضمد والخبير الصحي لقطاعنا والقطاعات المتاخمه له ان العلاج الوحيد لهذا البعير المتهالك .....ابرة خبط!!!!

فوقفت انا داعيكم فاغرا فاهي لهذا الحل التكنقراطي المرعب , وسعلت الرجل بأدب جم قل نضيره في مدينتنه المناضله مابعد السقوط ..شنهي هاي الابره الخبط بعد عمك.... بلكي اتفهمنه؟؟
 فرد عليّ باستهزاء وهو يمطّ شفتيه الغليضتين.... تهي بهي هو انت شمفهمك بالطب حتى تتمقلج علينه!!!
فقلت له وبأدب هم جّم....تقصد ابرتك هاي... تشبه حل السيد للمشكله السياسية في البلد...الاعتصام يبقه بالشارع وفوگه عودة الشرعيه..على تشكيل حكومة تكنقراطيه, على انسحاب من الاعتصام البرلماني...هيج خبط يعني !!؟
فرد المضمد  وهو ناقم من ثرثرتي  , صدگ لو گالو....جهله جهله جهله...زين ...
الحمد لله عمي اخذ ابرة الخبط وصار زين... بس رچله انشلت ولسانه شويه ثكل وصار ورم  وتخثر بفردة جعبه الايسر..بلاكت ام كاظم اتگول ربك لطف بحالنه, چا مو زين ماراح الزلمه امندینه!!!!.

فرحان العراقي
امير الفقراء