_ 1
أذبح لو ما أذبح ؟؟
______________

يقول سماحة السيد جواد الحسني، اثناء عملي في دار الافتاء توجه لي شاب بسؤال شرعي مع شرح تفصيلي كالآتي:-
سيدنه چنت آني وخطيبتي راجعين من فد طلعة خونفشاريه، ومن طبيت البيتنه فگدت الموبايل ولنه ماكو !!
دورت جيوبي ماكو ... اخذت تلفون اخويه عبسكه وخابرت على رقمي محد يرد !! اضطريت ارجع امشي بنفس الطريق بلكت واگع مني.
المهم سيدنه طفرت روحي لربها، رفعت ايدي للسما وگلت .. إلهي اذا لگيت الموبايل، نذر إلا اشتري لوجهك طلي.
أيست فخابرت على فطوشه خطيبتي گلتلها اذا خابرتيني او دزيتي رسايل إليه ومجاوبتك لتقلقين حبي، ترة موبايلي إنخمط !
سيدنه .. فطوشة گالت لتخاف موبايلك يمي سمسم.. لان انته من توضيت بالزوراء وردت تصلي گتلي فطوش خلي بجنطتك،
بس حبيبي تره هديل الصاكه دزت مسج تكول مو تنسه الاوزو777.
ورشا المملوحه خابرت وتعاركت وياي تگول شلون خطيبي ينطيچ تليفونه؟
ولينا خطيه على الفايبر سالتني انتي منو؟ اشو بس گلتلها خطيبته گالت خلي يرجعلي كل الارصدة الي اشتريتلهيا !
سمسم آني مقلقانه عله دايح مثلك. بس موبايلك بي مقلقانات هوااااي!
يگول سيد جواد گتله اخي فدوه لفطوش وين سؤالك الشرعي؟
گال سيدنه، هسه اشتري طلي لو لا؟

2 _
خطية ابو الذهب راح بيها
______________

واحد بعمامة سودة دخل على محل ذهب.
الصايغ: تفضل سيدنا
گاله: انا المهدي صاحب الزمان
ضحك الصايغ وگاله گول غيرها سيدنا صحيح انته ابن رسول الله وجهك نوراني بس الامام ما يظهر لمثلي.
بهل اثناء دخلت مرة ورجال يشترون ذهب واختاروا قطعة ذهب، گال الصايغ تفضلوا استريحوا لمن اوزن القطعة، تفاجأ بالمرأة تجلس بحضن السيد!!!
گال الهه الصايغ: وين گعدتي بحضن السيد؟ جاوبته باستغراب: يا سيد؟؟ وينه ؟؟؟ شنو شبيك اخي ؟؟ تبيعلنه؟؟ لو نروح ؟؟ شو انته مو طبيعي!!! سكت الصايغ ووزن قطعة الذهب ونطوه المبلغ وراحوا.
گاله السيد ابني تره بس انته تشوفني، وبقى يحچي وياه وبهل الاثناء دخلت عائله اخرى ، وحدث ما حدث للعائلة السابقة.
بقى صاحبنه حاير، گاله السيد ابني اني ما محتاج منك شي واني ما اظهر لكل واحد الا للخواص، اخذ هاي قطعة القماش امسح بيها وجهك حتى يزيد رزقك.
الصايغ اخذ قطعة القماش بكل قدسية وقبلها وشمها ومسح بيها وجهه وطاح خدران مغمى عليه ....
السيد لم الذهب كله والاموال وكنس المحل كنس هو وربعه.
***
وفي يوم من الايام واذا بسيارة شرطة جايبين السيد مكلبچين اديه.
ضابط التحقيق گال للصابغ عندنا كشف دلالة، وزع القوة المسلحه وگال للسيد: هذا محل الصائغ اشرحلنه شلون سرقتوه
گال السيد ... سيدي دخلت على الصايغ وگعدت اهنا وگتله اني المهدي.. وشرح كل القصة ووصل الى قطعة القماش.
الضابط گاله شلون يله مثلولي
وگف الصايغ مقابل السيد، السيد انطوا قطعة القماش وخلاها بوجه الصايغ.
وچان الصايغ يوگع مغمي عليه.
الجماعة جمعوا الذهب والمال وراحوا.

العراق حاله حال الصائغ احتمال ينكنس مرة ثانية ...
بس السؤال ليش هم خلو بيه شي؟؟؟؟؟

3 _
على عنادهم .
____________

نسمع ونرى ونأكل كثيراً . ( الزردة ) للرسول محمد . ( التمن والقيمة, و كذلك الهريسة ) للحُسين . ( الجاي ) للعباس , ( خبز عروكَ ) لأ أدري لمن .. و لكننا سمعنا وقرأنا منذ نعومة أظفارنا عن نبينا و الأئمة والسلف الصالح أن أكلهم كان كسرة خبز او تمر ولبن او قبضة شعير اما اللحوم فكان ( الكفار ) يأكلونها و بشراهة كما نشاهدهم في الأفلام الدينية العربية . ! لم يردنا من القديم أسم ( تمن ) ولا( شاي ) أو ( خبز عروكَ ) و لا ( القيمة ) و لا حتى ( الهريسة ) كانت ضمن أكلات السلف الصالح ولربما لا يعرفونها او لم تكن موجودة أصلاً , فلماذا إذاً ناس اليوم يطعموننا بها و يصبون لنا الشاي بأسمائهم ؟
أن كان المتبرعون من اتباعهم ومحبيهم فلماذا لايتأسوا بهم ؟؟ شنو عناد ؟

4 _
السرقة بإسم الدين .
___________________
عندما عرف صاحبي أن تكلفة تثبيت لوحة لآية الكُرسي في ديوان محافظة البصرة بلغت 42 مليون دينار ! قال / الحمد لله ما حطوا سورة البقرة جان فلوس الخزينة خلصت و تداينة من دول الجوار !!!!!

حسن أسد

• لافتات -6-
  27/02/2017 - 08:01
• لافتات -5-
  19/02/2017 - 00:25
• لافتات -4-
  09/02/2017 - 06:33
• لافتات -3-
  30/01/2017 - 06:23
• لافتات -2-
  21/01/2017 - 05:26
• لافتات -1-
  13/01/2017 - 02:05