فتاوي تيك أواي Take away
    الأثنين 14 أغسطس / آب 2017 - 23:14
    سامي البحيري
    [[article_title_text]]
    ولمعرفة المزيد عن كشك الفتاوي ممكن الرجوع إلى الرابط التالي لموقع محطة اذاعة ال بي بي سي
    http://www.bbc.com/arabic/media-40710554
    وكما هو واضح من الصورة فإن كشك الفتاوي هو تابع للجنة الفتوى التابعة لمعهد البحوث الإسلامية بالأزهر الشريف وهو موجود حاليا بمحطة مترو الأنفاق بالقاهرة (محطة الشهداء) على إيدك اليمين وأنت داخل رصيف المحطة قبل بوابات الدخول على طول !!
    ومع إنتشار مطاعم الوجبات السريعة في مصر والعالم كله، فما المانع بأن يكون هناك كشك للفتاوي السريعة، يعني بلغة العصرفتاوى "تيك أواي"
    ومن المعروف أن الناس عندما يتحركون داخل محطات المترو يكونوا مستعجلين ويدوب يلحقوا المترو، لذلك كان وجود كشك الفتاوي مباشرة قبل بوابات الدخول في غاية الأهمية ، يعني الراكب من دول يكون بيجري عشان يلحق خط مترو حلوان، وهو بيجري يشوف كشك الفتوى، فيقول لشيخ الكشك وهو في الوضع "جاريا" : الله يخليك يا سيدنا الشيخ ممكن أصلي في المترو صلاة العصر بدون ما أكون متأكد من إتجاه القبلة؟؟
    فيخرج الشيخ من الكشك ويشمر الجبة والقفطان ويضعهما في اسنانه متخذا الوضع "جاريا" ايضا قائلا: نعم يجوز بشرط الإستغفار، فالمهم هو النية، ولا غبار عليك لأن المترو يغير إتجاهه دائما؟؟
    فيلحق الراكب المترو بالعافية، بعد أن أستمع إلى الفتوى فيشكره قائلا:" الله يخليك يامولانا"، ويغلق باب المترو في اخر لحظه على صباعه!!
    ...
    وتدخل راكبة كشك الفتوى ومعها سبت خضار في يد وممسكة بطفل في الرابعة من عمره في اليد الأخرى، ويبدو أنها ليست في عجلة من أمرها، وتسأل شيخ الفتوي: والنبي يا سيدنا الشيخ، هو منين خط المترو بتاع السيدة زينب؟
    ويجيبها الشيخ قائلا: يا ست ده كشك الفتاوي، أنا مش ناظر محطة المترو
    الراكبة: كشك فتاوي يعني إيه؟ إزاي يعني؟
    الشيخ: يعني لو عندك سؤال ديني أو أي مشكلة دينية ممكن تسألينا وأحنا نجاوب عليها؟
    الراكبة: بجد؟؟ الله يخليك يا سيدنا الشيخ ده أنا كان نفسي أكلم محطة "الرسالة" في التلليفزيون عشان أسألهم على مشكلتي.
    الشيخ: إيه مشكلتك يا ست ، إتفضلي إستريحي، تحبي كوكا كولا مع الفتوى؟
    الراكبة تجلس وتضع سبت الخضار فوق مكتب سيدنا الشيخ وتضع طفلها فوق حجرها، ويبدأ الطفل بالبكاء
    الشيخ: معهلش يا حبيبي، خد إلعب في الكتاب ده، ويعطيه كتاب فتاوي إبن تيمية
    ويبدو أن الطفل قد إعجب بفتاوي إبن تيمية، ويهدأ قليلا، ويوجه الشيخ حديثه للراكبة:
    - إيه مشكلتك يا ست؟
    الراكبة: بقى يا سيدنا الشيخ، أنا متجوزة جوزي من خمس سنين ومخلفة منه الواد المضروب ده.
    الشيخ: ربنا يخلي، إيه المشكلة؟
    الراكبة: المشكلة إني إكتشفت من 3 شهور بس إنه كان متجوز ومخلف من زمان قبل ما يتجوزني.
    الشيخ: طيب إيه المشكلة في كده، ده حقه شرعا ما دام لم يتزوج أكثر من أربعة
    الراكبة: أربعة إيه؟؟ جته أربع مصايب فوق دماغه
    الشيخ: ليه بس يا ست تمني الخير  لزوجك وأبو إبنك
    الراكبة: حيجي منين الخير، المشكلة إنه مخبي على وما قاليش قبل الزواج، لأنه لو قال لي ما كنتش قبلت بيه، هو أنا بايرة ولا إيه؟؟
    الشيخ: لأ ... ده أنتي زي الفل ما شاء الله،
    ويطبطب الشيخ على يدها، فتبعد يده بقوه قائلة:
    - إيدك جات كسر إيدك
    الشيخ: يا ستي الراجل من حقه يتزوج أكثر من واحدة وليس فرضا عليه أن يخبر أو يستأذن من زوجته القديمة أو يخبر زوجته الجديدة
    الراكبة: يعني إنت رأيك كده؟
    الشيخ: ده يا ستي مش رأئي ده رأي الشرع، عن أبو هريرة رضي الله عنه أنه قال:  ؟؟؟
    تقاطعه الراكبة قائلا: بلا أبو هريرة بلا أبو جلمبو، روح ياشيخ إلهي مراتك تتجوز عليك من وراك أنت وأبو هريرة بتاعك، يلا واد نلحق المترو، الله يخرب بيوتكم
    !!!
    والحقيقة ان فكرة كشك الفتاوي هي فكرة عصرية جدا، ما دامت الفتاوي تحاصرنا من كل مكان، تفتح التليفزيون تلاقي فتاوي، تفتح الراديو في العربية تلاقي فتاوي، تفتح البوتاجاز تلاقي فتاوي تفتح الحنفية تنزل مية مخلوطة فتاوي، تفتح الجورنال تلاقي صفحة كاملة فتاوي، فايه المانع الفتاوي تيجي لغاية عندك كمان في المترو؟؟ وأيهما اهم في رأيك دورة حمام عمومية نظيفة ام كشك فتاوي؟ انا اعتقد ان كشك الفتاوى اهم كثيرا من دورة المياه النظيفة، لان الفتوى هي غذاء الروح، وممكن تمسك نفسك وما تخشش الحمام لغاية لما تروح بيتكم لكنك لا تستطيع ان تمسك نفسك حتى تصل بيتك وتسمع وترى الفتوى على القناة الفضائية، وإلا ممكن تعمل فتوى على روحك!!
    ولقد سمعت ان وزير النقل قرر غلق كشك الفتوى بعد عيد الأضحى القادم؟ ولست ادري سر غلق الكشك؟ هل لقلة الزبائن ؟ ام لزيادة المصاريف؟ ام لان الناس وانا واحد منهم نزلوا وحينزلوا تريقة على كشك الفتاوي؟؟ لان الحقيقة الكشك ده منجم فكاهة! وربما لا يدانيه في الفكاهة سوى مرتضى منصور رئيس نادي الزمالك.
    وبما انه سيتم غلق كشك الفتوى، وحرصا على وظائف مشايخ الكشك، فانا اتبرع ب "سبت" فتاوي لكل شيخ فتوى لكي يتحرك به داخل المترو وحيث تذهب الفتوى الى مستحقيها داخل المترو، وممكن لزيادة الإيرادات ان يبيع الشيخ المفتي أشياء مطلوبة ومهمة للركاب اثناء تجوله بسبت الفتاوي وان ينادي على بضاعته قائلا : فتاوي .. بيض .. سُميط.. جبنة.. بيبسي!
    samybehiri@aol.com
    © 2005 - 2024 Copyrights akhbaar.org all right reserved
    Designed by Ayoub media