كافي زَعـَـل!
    الأحد 14 يناير / كانون الثاني 2018 - 21:55
    ميسون نعيم الرومي
    يوجعني الزعـَـل....
    مابيـّـه حيل ازعـَـل !
    بسّ العـَـسـَـل....
    من حـَگـَّـه يتدلل
    رقـَّـه اوحـِـسن
    بيك أمتحن
    يا نسمه....
    مرت بالسـَـحـَـر
    يا حلو يا وردة عمر
    والورد ...
    من همسه ذبـَـل!
    بعيونك الحلوه زعـَـل
    مليت ياروحي دلـَع
    من قسوتك گلبي انشلع
    يوجعني زعلك والنبي
    كافي زعـَـل...
    مابيـّـه حيل ازعل !
    يا بعد روحي والمقـَـل
    تبقه تضل .. انت الأمل
    ***
    يوجعني الزعـَـل....
    والزعل بي جمره
    تچوي  بالگلب..
    والگلب بي حـَـسـّـرَه
    متقصد يول
    للروح تلسعهه
    يمته ولك ..؟
    والچلمه تسمعهه
    ملينه يول
    مسقول انت ..
    *لو نقل..؟
    وابمشيتك تكتل كتل
    يابدر ليلي واكتمل
    كافي زعل!
    بسك بعد
    يوجعني  زعلك والنبي....
    مابيـّـه حيل ازعل !
    تبقه اوتضل انت الأمل
    چا كافي يول
    بطل زعل
    يوجعني زعلك والنبي
    مابيـّـه حيل ازعل !

    * نقل:- نوع من الحلويات العراقيه كروي الشكل ابيض اللون
    فيه حبة حلوه
    -----------------------------------
    كانون الثاني / 2018


    © 2005 - 2024 Copyrights akhbaar.org all right reserved
    Designed by Ayoub media