جاسمية : اكلها طريمش يا ابو جاسم
    الثلاثاء 6 نوفمبر / تشرين الثاني 2018 - 20:37
    د. مؤيد عبد الستار
    مشهد تمثيلي ساخر 19
    * يايمه انطيني الدربين .. انظر ولفي واشوفه 
    لابس عباء شغل الدير ... تبرج ما بين جتوفه ...
    - هاذا الدربين شنو النوب ... صار بيها ولف ... يا عباء جاسمية .. !! لا شغل الدير ولا شغل الصين..
    ضيعنا الصاية والصرماية . بسـّج  تصجمين بينه .
    * جا من اكَـلك لا تركض وره مجلوب السلف .. ليش ما تسمع كلامي ! ها الاجيت ايد من وره وايد من كدام .
    - ليش هو بس آني  ... اشو كلها تركض وره مجلوب السلف  .. حتى ابو ناجي يركض ... عبن داهن زردومه  بـبرميل نفط 
    * انت شعليك بيهم .. همه وي ابو ناجي حبايب من زمان  .. والعنده حبايب يشبع كباب 
    - آنه كَـلت بلجن أحصّل لي لكَـمه .. خلكَـ  وزير  .. مدير  بلدية  .. شـو  حتى لحسه ما صارت من  نصيبي 
    * أبو جويسم .. لكَمه بذله ما تنفع .. شوف لك جاره .. ما يفيدك غير جَـد ذراعك 
    - آنه .. شسوي .. ما تكَـليلي .. ما تشوفيهم مثل جلاب الغاضرية .. منو يكَـدر عليهم !!!
    * صدك . وحدك ما تكَـدر عليهم ... لكن آنه وياك وأهل السلف من نلتم وكل واحد ياخذ فاس بيده .. نلعن سلفه سلفاهم ونخلي طشارهم ماله والي .
    - جا ماطول هيجي ..عليهم بويه عليهم .........

    رابط الحلقة السابقة 
    http://www.ahewar.org/debat/show.art.asp?aid=616600
    © 2005 - 2018 Copyrights akhbaar.org all right reserved
    Designed by Ayoub media & managed by Ilykit