دموع سومرية...
    الأحد 18 مارس / أذار 2018 - 10:48
    حسن حاتم المذكور
    خيـّه الهور برديه
    بـعـد  بـيـه ربـلـة  تـتـعـاتـب
    وخـلّـي الـروح تـنـشـدهـه ونـذكرهه
    حـلـو  كـلّـه .....
    مـحـاديـدة رطـب مـدفـون  بـعـروﮔـه
    عـﮕـّـيـده  حـلات  الـبـيـه
    هـيـسـة  طـبـﮓ  لـذتـهـه
    دوه  الـمـسـلول  خـرّيـطـه
    لـﮕّـّاطـه  الـتـرف  مـوصـوف
    روح  الـمـيـت  ايـردهـه
    حـذّافـة  رﮔـص  ﭽـوبـيّـة  فـوﮒ  الـماي
    يـبـزخ لـه  الـسـمـݘ  فـرحـان
    غـنـاوة  عـشـﮓ  بـرهـان  عـتـّبـهـه
    امـسـكّـه  هـلـهـلـت  بـالـلـيـل
    نـخـت  ﮔـطّـان
    يـصـالـحـهـه  ويـه  الـخـضـيـري
    ويـرد  ويـّاه  فـرحـتـهـه
    بـعـيـون  الـنـﮕـيـطـة  يـسـولـف  الـتـاريـخ
    ومـن  يـوصـل الـوسـفـة  يـبـوس  غـرّتـهـه
    طـراريـد  الـعـرس تـتـمـازح  ويـه  الـروج
    بـدريـة ... بـنـات  الـسـلـف  زفـّتـهـه
    الـزلـف  بـاثـة ... ومـوجـة  بـحـر
    مـا  تـنـفـرﮒ گـذلـتـهـه
    بـخـور  الـِسـعِـد ... فـزز  بالـجـنـوب  نـجـوم
    بـلـيـل  جـنـاغـهـه ... يـشـع  ﮔـمـر وجـنـتـهـه
    الـعـضـلـه ويـه  الـخـصـر تـفـصـال
    ﭽـن شـيـشـة بـطـن فـانـوص رﮔـبـتـهـه
    والـمـﭽـوﭽـب ...
    فـوﮒ الـسـده  مـتـخـوصـر
    هـو والـسـلـف والـعـيـد نـاطـرهـه
    الـسـفـيـفـة الـخـصـر حاضـنـتـه
    وخـاﭽـيـة الـعـرس فـوﮒ الـﭽـتـف  ذبـهـه
    .....................
    ولــݘ بالـهـور تـاريـخ الـوطن خـضّـر
    الـديـره ويـاه فـد ريـه
    وبـيـه مـزروعـه هـيـبـتـهـه
    الـطـيـن الـبـيـه اصـل كـل طـيـن
    وي حـيـل الـﮕصـب ﮔـامـت حـضـارتـهـه
    حـتـى ال بـالسمـه سـجـدت ... نـخـت  ربـهـه
    يـبـدّل  بـيـه جـنّـتـهـه
    مـن ريـجـه يـجـي الـكـوثـر
    هـواه  يـنـشـف الـدمـعـة
    ويـرد لـلـروح بـهـجـتـهـه
    مـثـل عـيـن الـصـﮕـر صـافـي
    سـمـانـه بـيـه تـتـمـره
    وعـلـيـه تـشـوف صـورتـهـه
    ..............
    خـيّـه ... شـغـيـر الـدنـيـه
    وطـراجـيـع الـدهـر كـلـهـه
    عـلـى راسـه وﮔـع شـرهـه
    الـمـصـيـبـة الـبـيـه لا صـارت ﮔـبـلـهـه
    ولا بـعـدهـه تـصـيـر
    عـلـيـه كـلـفـه وصـعـب حـلـهـه
    لا تـنِّـسـي ونـنـسـاهـه
    ولا نـﮕـدر نـسـولـفـهـه
    .................
    عـلـى الـغـبـرة شِـلـه سـمـﭽـه
    وبـيـه الـوكـت فالات الـغـدر رزهـه
    بحـزنـهـه غـارﮔـه طـيـوره
    وجـه الـصـبـح ...
    طـوب إخـريـه فـززهـه 
    نـشـف ريـجـه الـﮕـصـب ذبـلان
    وضـلـوعـه لـخـنـازيـره
    ﭽـباشـة مـوت وسّـدهـه
    ..................
    ولـك يـا هـور ضـيـم الـبـيـه مـن ضـيـمـك
    ومـثـل ريـتـك
    ريـتـي  الـهـضـم زارفـهـه
    ذاك الـيـتـّم طـيـورك
    نَـغـل والـرضـعـتـه ( صـبـحـه )
    غِـيـره ولا شـرف عـدّهـه
    الـدنـيـه عـتـاب مـا تـسـوه
    لـلـذل نـزل عـالـيـهـه
    وصـد لـلـعالـي سـافـلـهـه
    الـبـيـنـه صـار مـو قـسـمـه
    كـل لـحـيـه الـخـره الـبـيـهـه
    اديـّه الـبـيـه حـنـتـهـه
    ..............
    ولـك يـا هـور دنـيـانـه فـرس جـربـه
    عـلـفـهـه تـبـن وابـن الـعـار راكـبـهـه
    زلـم هـذا الـوكت ﭽـنـهـه
    دجـاج زبـاله مـدفـونـه بـمـكـاتـبـهـه
    شـفـت دنـيـاك
    كـلـهـه تـﮕـطّـع بـلـشـتـك
    هـذا يـبـيـع ...
    وذاك يـشـتـري مـنـهـه
    ــــــــــــــ
    ربـلـه  : بـقـيـة
    مـحاديـد : فسـائل
    الـعـﮕّـيـد : نـبـتـة بـردي صـغـيـره ( ترفه )
    الـحـذّاف  : نـوع مـن طـيـور الهور
    الـنـﮕـيـطـه : اسم جاموسه كان يمتلكها جـدي
    بـاثـة : مجموعـة سنابـل
    الـمـﭽـوﭽـب : الـوسيم
    الـسـفـيـفـة : حـزام
    الـﭽـبـاشـة : مخبـأ ( سرير ) الخنزير الوحشي


    كتبت بمناسبة تجفيف الأهوار..

    © 2005 - 2024 Copyrights akhbaar.org all right reserved
    Designed by Ayoub media