(كأسراب جراد صحراوي جائع, ادخل التوافق الأمريكي الأيراني احزاب الأسلام السياسي الى حقل العراق لتفترس اخضره ويابسه, ثم تمضغ رجفة النفس الأخير للوعي العراقي, انها النكبة, عندما ينتصر فيها  جراد الجاهلية على مدنية القرن الواحد والعشرين, لمن نشتكي اذن, للرب على من ارسل جراد (ابابيل) ليجعلوا العقل العراقي "كعصف مأكول" ام نعاتب نبي الأسلام, يستبدل حضارات رافدينية خضراء بجفاف همجية الصحراء, او نشكي ذاتنا, لماذا ضيعنا حقيقتنا في تاريخ ليس لنا؟؟؟.)

1 ـــ في شارع ابو نؤاس (سابقاً) شاهدت الشاعر معروف الرصافي يفترش الأرض ويأكل جرية "مسگوفه" سألته:

ـــ هل ستنتخب؟؟؟ 

ـــ نعم: تقول حكومتنا انه واجب وطني "وحشر مع الناس عيد". 

ـــ من ستنتخب؟؟؟ 

ـــ حكومة تشكلت.

ـــ تشكلت؟؟؟ 

ـــ نعم ... في العراق تظهر النتائج وتتشكل الحكومة قبل الأنتخابات.

ـــ ومن شكلها؟؟؟ 

ـــ اغلبية برلمانية عابرة للطائفية من أئتلافي انصار الحسين وانصار يزيد, وباركتها امريكا والغرب والجوار وهيئة الأمم المتحدة والجامعة العربية ومنظمة المؤتمر الأسلامي.

ـــ من هم انصار الحسين؟؟؟

ـــ احزاب اسلامية تتكاثر في مستنقعات جهل الأمة لنفسها, ترتدي اسم الحسين كما ارتدت اسم الله كأعلان انتخابي, يطلق علبها العامة جماعة "اخذناها وما ننطيها"

ـــ هسه افتهمت, تقصد جماعة تحالف "تي تي... تي تي"؟؟

ـــ احسنت. 

2 ـــ في ساحة النهضة (سابقاً), سألت ثلة من اليساريين (سابقا.)

ـــ "اخوان هاي ساحة النهضة"؟؟؟.

ـــ "لا اخي هذه ساحة الصدرين وين تريد"؟؟.

ـــ "لمدينة الثوره, شارع ستين"

ـــ "اخي عنوانك غلط, هاي السيارات تروح لمدينة الصدر, وشارع شهيد المحراب".

ـــ "وسوگ مريدي وسوگ چماله؟؟.

ـــ "اكو سوگ الأمر بالمعروف وسوگ ام المؤمنين".

ـــ  "اخواني وين الگي مدينة الثورة؟؟" 

ـــ "تقصد يتيمة الزعيم, اخي طلگوهه الأمريكان من صدام وزوجوهه الى الصدر, وتگول الناس راح يطلگوهه من الصدر قبل الأنتخابات الجايه ويخيطون الهه رگعه جديده".

ـــ قصدك يصير السحل بالعمايم.

ـــ والله الي يحصل على حفره مثل صدام يحمد الله ويشكره.

ـــ "سؤال اخير اخوان, منهو راح تنتخبون؟؟؟".

ـــ ننتخب معارضة وطنية من ائتلاف (سائرون) بقيادة الرفيق المناضل مقتدى الصدر ونائبه الحاج المجاهد رائد فهمي.

ـــ عفيه رفاق شدوا حيلكم و"حملوا جمال".

3 ـــ . وسط المرحوم شارع الرشيد, سألت بعض الباعة المتجولين: 

ــ "اخوان منهو راح تنتخبون"؟؟

ـــ "خويه طلعت النتائج وتشكلت الحكومه في 02 / 04." 

ـــ "وشراح نعمل يوم 12 / 05؟؟؟

ـــ "تصادف عطلة رسمية بمناسبة اربعينية بيعة حكومتنا الجديدة".

ـــ تقصد حكومة الأمر بالمعروف؟؟؟

ـــ شوف اخي, العراقيون مهدوا لأمريكا لأسقاط نظام الرسالة الخالدة, والآن اكملوا لها نهاية نظام الأمر بالمعروف, لكن قرار العراقيين احيانا يسبق قرار المشروع الأمريكي في التغيير ولنا في فجر 14 / تموز / 58 خير عبرة ويقين.

ـــ  اگلك: ليش الغبي من يگعد على كرسي الحكم, ما يتركه الا بـ (الحشاك)

ـــ شوف خويه, اليگعد على كرسي الظلم برضاته, ما يفيد وياه الا (الحشاك)

4 ـــ في مطار بغداد الدولي التقيت سماحة وزير العائلة, بعد الترحيب شرح لي بأسهاب آخر التطورات والمستدات السياسية والأمنية والمالية, واجاب على اسألتي  مشكوراً.

ــــ فخامة الوزير, علمنا ان الحكومة قد تشكلت فما هي حصتكم في التشكيلة الجديدة؟؟؟

 ـــ نفس الحصة, وزارة سياديه واخرى خدمية وثلاثة سفارات, هذا توافق والجميع متفقون عليه, الأنتخابات قضية شكلية, الوزارة السيادية راح يشغلها ابن الحجية زوجتي الأولى والخدمية يشغلها ابن الحجيه زوجتي الثانيه.

ـــ واولاد الثالثة, والبنات؟؟؟

ـــ الأولاد اشغلهم بوزارة احد الكتل ونشغل عدنه اولادهم, حتى نرفع عنا "القال والقيل" تعرف شعبنا جاهل ويصدگ الأشاعات, اما البنات, نوزعهن على السكرتاريات.

ـــ واولاد الرابعه, اقصد "الزغيره"؟؟؟

ـــ "يمعود ذاك اليوم تزوجنه, بعدهه ما تعدت العشرين, وما عدهه خبره, راح اخليها تشرف على ادارة املاك العائلة في لندن وضواحيها.

ـــ فخامة الوزير, نلاحظ كل وزارات التحالف الوطني يشغلها اولادكم؟؟؟

ــــ نعم , نحن نلبي توجيهات المرجعية (الرشيده) في تغيير الوجوه بدماء شابة غير معروفه.

ـــ  فخامة الوزير, يتحدث العراقيون, ان امريكا ستغير النظام الأسلامي في العراق برمته, والعراقيون لهم ثار معكم مثلما كان لهم مع النظام البعثي, شلون راح تدبرون حالكم وياهم؟؟؟..

ـــ اجاب فخامته بعصبية وخوف "شوف احنه اخذناهه وما ننطيهه, ثم ان فتوة من (المراجع العظام), تقلب سافل امريكا على عاليها.

ـــ  سؤال اخير فخامة الوزير, گلي بروح ابوكم, صاروخ (الفتوى) كم (فـ 16 راح يسقط هههه؟؟؟

 ضحك وضحكنا وانصرفنا كل الى سبيله.

Mathcor_h@yahoo.de