حـِنـَّة عـرس
    الأحد 17 يونيو / حزيران 2018 - 05:09
    ميسون نعيم الرومي
    عطشانه السواجي اسگيهه مي العين
    من روحي نبع يضوي على الشطين
     
    يادجلة اوفرات العذب بيه الماي
    نجمه وي گمر وامطرزه الجرفين
     
    جوري الورد نعناع ويه الياس
    يتمايل غنج ويعطر الجنبين
     
    يتهاده البلم محله العتابه اوناي
    والنسمه سـِـحر واتغازل الخدين
     
    والطين الحمر ياقوت وي مرجان
    حنـَّه للعرس وايحني بالچفين
     
    تركعله الشمس تغسل ظفاير بيه
    يا مي الفرات امن الجنه مي العين
     
    ون گلبي جرح يبچيك هم تبچيه
    والنخل انذبح ياحيف العنب والتين
     
    خنجرهم غرز يذبح جمال البيك
    يادجلة عشگ يا غنوة الطيبين
     
    اهوار التراث العطش طگهه الموت
    يادجله اوفرات الغدر واصل وين؟
     
    أسمع للنخل والصوت وا ويلاه
    حاني رگبته والفاس بالجنبين
     
    ذله والمهانه اشلون تحمل ليش
    يعراقي انتفض السكته للمسكين!
    السكته للمسكين

    حزيران / 2018
    ســـــــــــتوكهولم
    © 2005 - 2024 Copyrights akhbaar.org all right reserved
    Designed by Ayoub media