لى العامل في عيده (1/آيار/2019)
    الأربعاء 1 مايو / أيار 2019 - 18:24
    ميسون نعيم الرومي
    بعيدك يبو الأحرار.. جاي آنه اعايد

    انت الرجه للناس .. وكت الشدايد

    ***

    تتلاوه ويـّه الريح (اسطولك) مهابه

    يالعامل  فخر للناس .. وانت الطبابه

    ***

    لا ضل أبد مجداف .. لا ضل سفينه

    كلهه صفت للجار .. كتلوْ العينه

    ***

    چاكوچك يهز الكون .. يالچنت أول

    بالتال اوصرت چا ليش ! والوكت حوّل

    ***

    چاكوچك فخر للناس .. وانت الطليعه

    يالعامل المغوار .. تسكت .. شنيعه

    ***

    وين المطرگه اوچاكوچ ! وين الصناعه

    شاخت الف يا حيف .. انباعت بضاعه

    ***

    بالواحد امن (آيار) .. تهتز الاكوان

    تسكت يعامل ليش ! تترجه لحسان

    ***

    خالي الوطن مسحوه .. بس ضلـَّت البوم

    والشـعب يبچي اينوح .. ايلملم بالدموم

    ***

    يالعامل اصحه اوشوف .. سيـّسـَـت (بغداد)

    (أيـسّـنه) نبچي ادموم .. عيشـتنه بالكاد

    ***

    من حرب الحرب منذور يا شعب الاحزان

    هالتحمي فستكان افلان .. والوطن غرگان

    ***

    يالمعتني (لحسين) .. تنذر بالنذور

    (حسين) اول اومن ثار.. عَ الظلم والجور

    ***

    ايد اوتساند ايد .. عامل وفلاح

    نطرد دخيله اشرار.. واتعم الافراح

    ***

    نترجـَّه ذاك اليوم .. يصحه شعبنه

    يرجع وطنه ابعز.. ايرفرف علمنه

    -----------------------------------------

    1 / آيار / 2019

    ســــــــــتوكهولم

    © 2005 - 2019 Copyrights akhbaar.org all right reserved
    Designed by Ayoub media