المشهد الاول
المنظر: مكان يحتوي على حديقة (كازينو ) يجلس فيها الشباب وبجانب الحديقة دائرة حكومية والمسرح خال ومن ثم يدخل مجموعة من شبابنا الضائع بملابس غريبة وهم يرقصون ومن ثم يجلسون على احدى الارائك).

الشاب الاول : اكعد ..اكعد ..خل اخذلك خيط..(يخرج خيط وياخذله خيط)..اكول شنهي الخبطة النطيتكياهه مافادت ؟؟

الشاب الثاني : لا ولله ..ولا فادت سوت وجهي كربة .

الشاب الاول :زين البارحة شفت مسلسل نور؟؟

الشاب الثاني : ولك يانور ...انته ولله بطران...هي هاي هم افلام ...(ينتفض ويقف ليكلم الجمهور) الله عليكم نور احله لو لافلام المدبلجة ...الافلام المدبلجة بيه حرية ...وبيه طرق مختلفة للحب.

الشاب الاول : دتعال ...تعال ..خل اكملك الخيط ..لا تضل تخربط ..

(يدخل ابو محسن وهو من الريف ومعه ابنه محسن ).

ابو محسن : ها هالدخلنه للولايه ....(يقرأ هوسة من هوسات العرايض عن طيبة العمارة ويهوسون الجميع معه ومن ثم يقف يصفن لابنه كيف يتراقص) ها بويه تسودنت ..شجاك بعده مادشينه للولايه ...(ينتبه الى الشباب المايع فيتصورهم نساء فيصرخ) بويه ...روح كل لخياتك ايغطن نفسهن ...

محسن: اخياتي ..وشجابهن اهنا...(يذهب محسن يستطلع فيكتشف انهم شباب فيعوزد لابيه ) بويه هذوله شباب ...

ابو محسن : (بتعجب) شباب ...جالحديثات شيلبسن يبعد بوك ...

محسن : يابه جا مثل حضي من تطلع لحد ماتغيب سارح بالنعجات ..

ابو محسن : د يالله ...تعال ..تعال ضم غنيدرتك لايبوكونه ولد الولاية وخل نروح نسلم على الوليدات ...(يذهبون ) ها بويه السلام عليكم .

الشباب : هلو عمو

ابو محسن : هله يابعد بيتي ....(للجمهور) ياجماعة الولد مربعين ....(ينزل عند قدم الشاب الثاني فيما يقوم الشاب الاول بتغيير معالم ابنه محسن وجعله من ريفي خشن الى مايع سبايكي ) جا حجلك وينه.

الشاب الثاني: نسيته بالبيت ...

ابو محسن : (للجمهور) ولكم حتى ام محيسن بيوم عرسه الاجت بيه شيوخ العمارة والمشرح وكميت والمجر ماتدندشت مثل الولد...(يتفقد ابنه ولم يجده ) محيسن ...بويه محيسن ..وين صار هالفرخ ...

محسن : (يتقدم الى ابيه وهو مختلف جدا ومايع جدا ) هلو بابي .

ابو محيسن : (بتعجب) بابي .... هذا منين المجولك ..

محسن : بابي انه محسن ...

ابو محسن : بويه انه عندي ولد اسمه محيسن وعيب اسمه محسن.

محسن : (ينزع النظارات ) بابي شبيك ماعرفتني ...

ابو محسن : (للجمهور) ياناس محيسن توني ضيعيته ..يصير كلب من ذكر لانثى (لمحسن) خوش يبويه انه عندي دليل ...(يخرج حذاء محسن) هاي غنيدرت محيسن اذا صارت عليك فانت محيسن واذا لا ولله ماصارت عليك فانت محسن ابن محسن وروح الله يحسن عليك (يكعدون بالكاع ويلبسه الحذار بالكوه فيصير عليه ) أي ولله هذا محيسن هابويه شجاك تخبلت ...

محسن : بابي عل موديل ...

ابو محسن : بويه وشنهي هذا البوشهك..؟؟

محسن : توب شيرلي ...

ابو محسن : شنهي هاي اجله يبويه .

محسن : لا بويه علموديل ..

ابو محسن: (يرفع عكالة ) وراح اكتلك يبويه اليوم علموديل (يركض وراءه ويلوذ بين الشباب فيضربهم جميعا ) انتم شباب انتم ...

الشباب : (يصرخون) لا عمو... لا عمو ...

ابو محسن : (يضرب الشاب الثاني ) لا بنينه الوطن .

الشاب الثاني : اوي ..لا تضرب ..

ابو محسن : دكعد ..دكعد جنك حيه تطوه ..(للشباب) عاجبكم يبويه الحال والكعده والشوارع .

الشاب الأول: جاشنسوي عمو ...وين ما نروح مايشغلونه .

ابو محسن : ليش بويه العراق وخيراته ماتكفي ..اشو هسه ماشاء الله اطي ثلث ملايين وتتعين .

الشباب : يالله الله وايدك .

ابو محسن : آه....جاخوش انه جاي حتى أعين أخوكم محيسن تكوموا تعالوا وياي بلكن تتعينون وياه .



المشهد الثاني
المنظر: باب دائرة يقف في مقدمتها حارس امن والكل يقف وهو يحمل فايلات تعيين ويدخل ابو محسن ومعه الشباب يحملون فايل .

ابو محسن : ها بلكن اليوم وتتعيينون لان مدير هلدايره جده يصير كرايب جدي .

الحارس الامني : قف ...وين رايح .

ابو محسن : (بخوف) شجاك بويه ..انه جاي اعين اخيواتك هذوله .... لان مديرك يصير جده كرايب جدي .

الحارس الامني : شتكول ...

أبو محسن : مديرك يصير جده كرايب جدي.

الحارس الامني : كلشي مافتهمت منك ..واحنه ماعدنه مدير ..عدنه استاذ ..عدنه مسؤول ....دروح ..دروح هناك ..وهسه يجيكم المدير ...

ابو محسن : (للشباب) جاشنسوي يبويه ..شغلتك اذا صارت يم شسمه كله حجي شسمه ..(يلتفت ويرى احدهم خارج فيتصوره المسؤول ) هالاجه المسعول ..اجه المسعول .

محسن : بيويه مو المسعول ..المسؤول ...(يذهب ابيه وللشباب ) شافله واحد يكح عباله مسؤول.

ابو محسن : (للشاب الخارج من الدائرة ) ها بويه السلام عليكم .

الشاب : وعليكم السلام

ابو محسن : بويه انت ياهو منهم ..الاستاذ ..المؤول ..المدير ...

الشاب : انه لا هذا ..ولا ذاك ....انه كرايب المدير جيت وعيني ..

ابو محسن : شعينك يابعد بيتي ...كحاحه يبويه ...المهم ..كلي شلون أشوف الأستاذ ..

الشاب : من اتشوفلك واحد اكرع وعنده كرش وراه خمسه حراس كول هوه هذا المسؤول تعال وجلب بيه (يجلب بيه ابو محيسن) مو تجلب بيه اتجلب بيه ( ويرمي ابو محيسن على الأرض ويخرج).

الشباب : طاح الشيخ ..طاح الشيخ (يحملوه )

ابو محسن : مابيه شي ..مابيه شي .

الشباب : مابيك شي ؟؟؟ (يرمونه على الارض فينكسر ظهره).

ابو محسن : (ينعى )يابويه نكسر سنسولي.

الشباب (يهوسون ) ابو محيسن يبويه نكسر سنسوله ..

الحارس الامني : شنهي هاي شعدنه مستشفى لو فاتحه ..

ابو محسن : شبيك يبويه نكسر سنسولي .

الحارس الامني : دكوم لا اكسر راسك

ابو محسن : راح اكوم ..هي يلميلح ...جا ماتجي الانتخابات ..(ينسحب أبو محيسن والشباب الى الخلف ) وهسه تعالو (يوزعهم) انته على الميمنه ...وانته على الميسرة ...وانته بالمتغدم ...وريد اشوف منين يطلع المسعول ...ليوصل حدنه نكص ايده ..

(يخرج المسؤول وحمايته )

المسؤول : (للحارس الامني) شنهي هاي ..شكو.

الحارس الامني : هذا شيخ ويريد ايعين جماعته ..وانته موصينه مانعين الا ابن عمك ..ابن خالك ..كرايبك ..

المسؤول : أي ..اي ...بس راح يكطعون علينه الطريق .

الحارس الامني : احنه عد عيناك استاذ ...

المسؤول : (للابو محسن) تعال انته ابو عكيل ..تعال ..

ابو محسن : حاضر ستاذ..

المسؤول : (يلتف حوله وبهمس) جنك جندي عربي ..

الشباب : (يهوسون مع ابو محسن ) انه جندي عربي ..بندقيتي بيدي ..تي ..تي ..طا.

المسؤول : شعندك ..هنا .

ابو محسن : جاي اعين اخيوانك ..دشوفهم من كد ماكاعدين حتى وجوهم كسبت ..

المسؤول : بس احنه مانعين الا ولد عمنه خوالنه ...بس انه عندك شهداء ..

ابو محسن : كل كرايبي موته ..

المسؤول : زين شهدائك ..ال ..باء ..جيم ..

ابو محسن : جاهمه الموته هم بيهم الف وباء وجيم ..هسه باء .

المسؤول : زين انه راح اشوفلك واحد من جماعتي يعينك ...

ابو محسن ( فرح للشباب ) راح تتعينون ...

الشباب : كله شكد يريد ننطيه ..

ابو محسن : ( للمسؤول) شكد ماتريد ننطيك ..

المسؤول : ها ..خوش ( بهمس) خل نخمط ..ومن نطلع الله كريم ..خوش تجيب الفايلات من الولد .

ابو محيسن : فايلاتكم بويه (ينفرد الشاب الاول ) هابويه اشو نفردت..

الشاب الاول : عمي انه كل ماقدم فايل مايقبولوني ..

ابو محسن : ليش بويه ..

الشاب الاول : يكلولي صلاتك مو مثل صلاتنه .

ابو محيسن : اها ..بويه انته مو تصلي على هاي الكاع ..

الشاب الاول : أي ..

ابو محيسن : تجيب فايلك هذا الحجي باطل اهم شي انته تصلي على هالكاع (يسلم الفايلات للحارس الامني ويهوس هوسه مديح ويخرج المسؤول ) كافي كافي لا تصيون لوكيه ياهو اليجي تهوسوله .

الشباب : احنه لو انته .(يخرجون ) .


المشهد الثالث
المنظر: نفس الدائرة الا الحارس فهو غير الحارس الامني الاول.

ابو محيسن : بويه موعدنه اليوم ويه المدير حتى تتعينون ..وترحون للسوك ..وتشترون للحجيه زقلابيه وكباب (يتجه نحو باب الدائرة ويعود ليكلم الجمهور) جا الميلح الجان باالباب وين راح ...(يتجه نحو الحارس الجديد ) ها بيويه السلام عليكم ..

الحارس : وعليكم السلام ..

ابو محيسن : بويه جالميلح الجان هنانه ماكو ..ولله جان خوش ولد ..عمره ماكلي روح لا جسر راسك .

الحارس : عمي انطيني مجال حتى احجي ..انته شرايد ..

ابو محيسن : انه رايد المدير ..متواعد ويايه ايعين الوليدات ..

الحارس : روح ..روح اوكف هنانه ومن يطلع المسؤول حاجيه ...

ابو محيسن : أي بويه اروح ....(يدخل المسؤول جديد ايضا ) شنهي هذا ياستار ..هذا منين المدحلب ...

المسؤول : (للحارس ) شكو ..شصاير ..

الحارس : ولله ماادري .

المسؤول : جانه مخليك ناطور خضره هنا..(يكلم ابو محسن ) اكول عمو شعند هنا ..

ابو محسن : انه متاني يطلع تعيين الوليدات ..لان المدير كالنه اليوم ..

المسؤول : المدير الاولي راح ...وانه هسه المدير الجديد ..وكل الموظفين كرايبي ..تريد شي.

ابو محسن : سلامتك يبويه جا ولوليدات ..

المسؤول : عمي راحن فايلاتهم ويه القبلي . انته منطيني فايلات .

ابو محيسن : لا ....جا وتالي ...

المسؤول : الله الوالي.

ابو محيسن : جا يمسؤول يجي ينسف شغل الكبله جا ماصار شغل هذا يبويه .

المسؤول : عمي هذا العدنه ...تريد سويلهم فايلات جديده

ابو محيسن : والاوليات ...

المسؤول : الله يرحمهن

ابو محيسن : جاشنسوي ..امرنه لله نسوي غيرهن ...(للشباب ) سو غيرهن يبويه .

الشباب : والفلوس؟ .

ابو محيسن : والفلوس ؟.

المسؤول : راحن وياه ..ومن اتسوون فايلات جدد لا تنسوون كل فايل وياه مليونين .

ابو محسن : ولما عنده .

المسؤول هاي مشكلته ....(للحراس) اذا جابو الفايلات وياهن دهن اخذوهن مابيهن طردوهم ..(يخرج).

الحراس: يالله امشو منانه يالله (يخرجون الحراس ).

ابو محسن : ولله مصيبة ..عود انه ردت اشغلكم حتى لا تبقون دايحين ..بس شسوي الامر اكبر منه ..ياناس ياعالم وين نروح ...

(يخرج المخرج من الجمهور )

المخرج : العليك يابو محسن طرحته ...وهذا حال العراق صار خمس سنين ...واذا نريد انغير هالواقع فعلينه ان نختار بالانتخابات صحيح ...

ابو محسن : هو بعد ياهو ليروح للانتخابات ..

المخرج : انته غلطان يا ابو محسن ..لا زم انروح ولا زم نشترك ونجيب نائب النه يخاف علينه ويحرك على الوطن وعلى مدينته وشعبه اكثر من حرصة على رضه حزبه عليه ..

ابو محسن : وهذا وين تلكاه ..

المخرج: اذا خليت قلبت يا ابو محسن ..والخيرين هواي ..بس علينه نحسن الاختيار بعيدا عن هذا كرايبي وهذا من حزبي وهذا موصيني عليه ...

ابو محسن : شلون انتخب وانه مامسجل اسمي لحد الان .

المخرج : هذا غلط ...لا زم نروح ونسجل انفسنه بمكاتب المفوضية لان العمارة مصيره ومستقبله بركابكم ..وتدري بان مستقبل اعمار المدينة متوقف على تسجيلنه ..

الجميع : شلون .

المخرج : راح تعتمد الحكومة على تسجيل الناخبين بتعداد السكان وتخصص مبالغ للاعمار على اساس نسبة التعداد السكاني ..فلازم نسجحل ولازم ننتخب ..تدري ليش ..

الجميع : ليش

المخرج : حتى الننتخبه ..مايجيبلنه مدراء فاسدين مثل الشفتوهم ..لان اذا هوه نظيف فما راح يجيب الا النظيف ...والعمارة تره بركبتكم

الجميع : حتى لا تتكرر المأساة راح ننتخب العراق.



انتهت